ᐃᓱᒪᒋᓪᓗᑎᒍ

ᓴᓚᒪᓐ ᐅᔭᕋᓱᒃ (1986-2012)

ᐱᖃᓐᓇᕆᔭᓐᓄᑦ ᓴᓚᒪᓐ ᑕᐸᑦᑎᐊᖅ,

ᓴᓪ ᑕᑯᔭᕆᐅᖅᑎᓪᓗᒍ, ᐱᓱᔪᒃᓯᒪᓚᐅᖅᓯᒪᕗᖓ ᐃᒡᓗᓕᐅᑉ ᐅᖓᑎᑦᑎᐊᖓᓐᓂ, ᐱᓯᒃᓯᒐ ᓇᒃᓴᖅᖢᒍ. ᐃᓱᒫᓗᖏᑦᑐᖅ, ᐃᓱᒪᒋᔭᖃᓱᖑᓪᓗᓂ ᐃᓅᖃᑎᒥᓂ, ᐃᓱᒪᑐᓪᓗᓂ, ᐃᔨᖏᑦ ᑕᑯᓪᓗᒋᑦ ᐃᔨᖕᓄᑦᑎᐊᖅ ᑕᐅᑐᒍᓐᓇᖅᖢᓂ. ᑕᐃᒪᐅᓚᐅᖅᑎᓪᓗᒍ ᐊᖅᓯᒃᑯᓐᓄᑦ ᐃᓚᐅᓕᓚᐅᖅᓯᒪᔪᖅ, ᐱᖑᐊᖅᑕᐅᓂᖅ ᑕᐃᔭᐅᔪᖅ ᑲᐅᔾᔭᒡᔪᒃ ᖁᖏᐊᖅᑕᐅᖃᑕᐅᔭᕆᐅᕈᑎᒋᓪᓗᓂᐅᒃ 2004-ᒥ.

ᐅᕙᑎᓐᓄᓐ ᐅᖃᖃᑎᒋᒃᖢᓄᒃ ᐅᖃᐅᑎᓚᐅᖅᓯᒪᒐᒃᑯ ᐊᖅᓯᒃᑯᓐᓂ ᐃᓚᐅᖏᓐᓇᕐᓂᐊᖅᐸ ᐊᕌᒍᒃᑯᓂ ᐃᒡᓗᓕᖕᒧᑦ ᓅᓐᓇᔭᕐᓂᕋᖅᖢᖓ, ᐃᓚᐅᓇᔭᕈᓂ ᐃᑲᔪᖅᐸᒡᓗᓂ ᐊᖅᓯᒃᑯᓐᓂ. ᐊᖏᕐᒪᓐ ᐊᕐᕌᒍᑎᓪᓗᒍ ᐃᒡᓗᓕᖕᒧᑦ ᓄᓕᓚᐅᖅᓯᒪᕗᖓ, ᓴᓪ ᐃᑲᔪᖃᑦᑕᖅᖢᓂ ᐊᖅᓯᒃᑯᓐᓂ, ᐅᒻᒪᑎᒥᓂᖓᖅᑐᒥ, ᑎᒥᖓᓐᓂᖓᖅᑐᒥᒃ, ᑕᕐᓂᖓᓐᓂᓪᓗ, ᐊᓐᓂᖅᓯᒪᔭᖏᓪᓗ ᓴᖅᑭᑎᐅᕋᖅᖢᓂᒋᑦ ᐱᖑᐊᕐᓂᒃᑯᑦ.

ᐊᒃᓱᕈᖏᒃᑲᓗᐊᕐᓗᓂ ᐅᕙᑦᑎᓐᓂᓗᒃᑖᖅ ᓴᖅᑭᑎᑦᑎᔪᓐᓇᓛᖑᓚᐅᖅᑐᖅ ᖁᖏᐊᖅᑕᐅᔾᔪᑎᒃᓴᓂᒃ. ᑐᓐᓂᖅᑯᓯᐊᖃᓚᐅᖅᑐᖅ, ᑕᑯᔪᒥᓇᖏᑦᑐᓂᒃ, ᐃᓱᒪᓇᖏᑦᑐᓂᒡᓗ ᓴᖅᑭᑎᑦᑎᕙᒃᖢᓂ, ᑎᑎᕋᖅᑎᐅᓪᓗᓂ, ᐃᖃᖏᑦᑐᓪᓗᓂ, ᐃᖏᐅᓯᓕᐅᖅᐸᒃᖢᓂᓗ... ᐱᖑᐊᖅᑎᒻᒪᕆᐅᓚᐅᖅᑐᖅ.

ᐃᓱᒪᖅᓱᖃᑦᑕᕈᒪᓪᓗᓂ ᓱᓕᐅᒐᓗᐊᖅ, ᕿᒪᓚᐅᕐᒫᑎᒍᑦ, ᐃᖅᑲᐅᒪᖃᑦᑕᓕᖅᖢᑎᒍᑦ. ᒪᓐᓇᒧᑦ ᓱᓕ ᖃᐅᔨᒪᖏᓚᖓ ᖃᓄᖅ ᑐᖁᓚᐅᕐᒪᖓᓐ.

ᑕᐃᒪᑐᖅ ᐃᓱᒪᖅᓱᓕᕆᑦ ᓴᓪ.

ᒋᐅᓪᒻ ᐃᑦᑐᒃᓴᕐᔪᐊᑦ ᓴᓚᑕᓐ

 

ᔪᐃ ᐊᒫᖅ (1989-2014)

ᔪᐃ,

ᑕᑯᔭᕆᐅᓚᐅᖅᓯᒪᒋᕙᒋᑦ 2004-ᒥᑦ, ᑕᐃᓱᒪᓂ ᑲᐅᔾᔭᒡᔪ ᖁᖏᐊᖅᑕᐅᓂᐅᓚᐅᖅᓯᒪᔪᒥᒃ ᒧᒥᖅᑎᖏᓐᓂ ᐃᓚᐅᑎᓪᓗᑎᑦ. ᖃᐅᔨᕙᓪᓕᐊᓕᕐᑎᓪᓗᒋᑦ ᐃᓄᑦᑎᐊᕙᐅᓂᕆᔭᐃᑦ ᐅᔾᔨᕆᓚᐅᖅᓯᒪᕙᕋ, ᐃᒡᓗᓕᖕᒧᑦ ᓅᑦᑐᒪᓂᕆᔭᕋ ᓴᖏᑦᑎᑉᐸᓕᖅᐸᓵᖅᖢᓂ ᓇᓗᖏᓕᕋᒪ ᐃᓚᐅᖏᓐᓇᑐᐊᕈᕕᑦ ᐊᖅᓯᒃᑯᓐᓂ ᑲᔪᓯᑦᑎᐊᕈᓐᓇᖅᑐᖅ.

ᓴᖏᓂᕆᔭᐃᓐ ᐱᒃᑯᓇᑦᑎᐊᓚᐅᖅᓯᒪᔪᖅ, ᐃᓄᖕᒥᓪᓗ ᑎᒍᒥᐊᓕᕋᖓᕕᑦ ᐊᒡᒐᐃᓐᓇᕐᓄᑦ ᖁᒻᒧᒃᑎᑦᑎᓯᒪᓪᓗᑎᑦ, ᐱᒃᑯᒋᒋᐊᓪᓚᒍᑎᒋᓪᓗᒍ ᓄᓕᐊᑯᓗᐃᓐ ᖁᒻᒧᒃᑎᖃᑦᑕᓚᐅᕋᖕᓂ, ᐊᒻᒪᐃᓛᒃ ᐸᓂᑯᓗᐃᓐ ᐳᕆᐊᓇ, ᐃᕐᓂᑯᓗᐃᓪᓗ ᕗᐊᔅᓕ. ᐃᓚᒋᑯᓗᒃᓯᒍᑦ ᖁᖏᐊᖅᑕᐅᖃᑕᐅᖃᑦᑕᖅᓯᒪᓂᕆᔭᓯ ᓄᓇᕐᔪᐊᕐᒥᐅᓕᒫᓄᑦ ᐊᒃᑐᐊᓂᖃᖅᓯᒪᔪᖅ.

ᐱᖃᓐᓇᕆᓕᓚᐅᖅᓯᒪᕙᒋᑦ ᑕᐃᒪᖓᓂᓐ, ᐃᓱᒪᕙᒃᖢᓄᒃ ᐃᒡᓗᓕᖕᒥ ᐊᔪᕈᓐᓃᖅᓴᖅᑎᑦᑎᕙᒡᓗᓄᒃ, ᖁᖏᐊᖅᑎᑦᑎᕙᒡᓗᓄᒃ, ᑲᑎᑉᐸᒡᓗᑕ ᐱᖑᐊᖅᑎᐅᖃᑎᒋᒃᑎᒍᑦ, ᐊᔪᕈᓐᓂᖅᓴᖅᐸᓪᓗᓄᒡᓗ, ᐃᓱᒪᒋᔭᖅᐳᑦ, ᐃᒃᐱᒋᔭᖅᐳᖅ ᐃᓄᖃᑎᑦᑎᓐᓄ ᑕᑯᑎᑉᐸᒡᓗᒋ ᐱᖑᐊᕐᓂᒃᑯ. ᐃᑲᔪᖅᑎᒋᒃᖢᓄᒃ ᐸᓚᒃ ᐸᒃᔅ ᓴᖅᑭᑎᓯᒪᕙᕗᑦ, ᐃᖃᐅᒪᑦᑎᐊᖅᐳᖓᓗ ᐅᖃᐅᓯᕆᓚᐅᖅᓯᒪᔭᕐᓂ “ᑕᒫᓂᑦᑐᓐᓂᕋᓗᐊᕐᓂᕈᑦᑕᓕ ᑕᓐᓇ ᐸᓚᒃ ᐸᒃᔅ ᑕᒪᓂᖏᓐᓇᓛᕐᒪᓐ”. ᑕᐃᒪᓐᓇᐅᑦᑎᐊᓕᖅᐳᖅ, ᓱᕐᓗᓕ ᑕᕐᓂᑦ ᖃᓂᒡᕕᓯᐅᖅᐸᒃᑐᑎᑦ ᑲᑎᖓᓕᕋᖓᑦᑕ, ᑮᓇᖅᐱᑦ ᑕᐅᑦᑐᖓ ᐳᐃᒍᓚᐅᖅᓯᒪᔾᔭᖏᓚᕗᑦ... ᓱᓕ ᐅᒃᐱᕆᔪᓐᓇᖏᓚᕋ ᕿᓚᖕᒥᓕᕐᓂᕐᓂ. ᔪhᐅhᐅ, ᑭᓱᑐᐃᓐᓇᕐᓂᒃ ᑕᑯᖃᖅᑕᖅᓯᒪᔪᐃᓐᓇᐅᓕᖅᐳᒍᓐ, ᐱᖅᓯᖅᑐᖅᓯᐅᒻᒪᕆᒃᐸᓚᐅᕆᓪᓗᓄᒡᓗ, ᐊᓄᕆᓯᐅᖅᖢᓄᒡᓗ, ᓯᓚᑦᑎᐊᕙᐅᓈᖅᓯᕙᒃᖢᓄᒡᓗ, ᖃᐅᒪᐃᓐᓇᖃᑦᑕᑐᖅᓯᐅᖅᖢᓄᒡᓗ. ᐅᐱᒋᑦᑎᐊᒻᒪᕆᒃᐸᕋ ᖃᐅᔨᒪᔪᓐᓇᓚᐅᕋᒃᑭᑦ, ᐱᖃᓐᓇᕆᓪᓗᑎᑦ. ᐃᖃᐃᑎᓯᒪᕙᒃᐸᑦᑎᒍᑦ ᐃᓅᓯᖅ ᐊᓐᓂᕐᓇᕐᒪᑦ, ᐃᓱᒪᒋᕙᒃᑕᕗᑦ ᐱᓕᕆᐊᕆᔪᒪᕙᒃᑕᕗᓪᓗ ᐊᑐᕈᒪᒍᑦᑎᒍ ᒪᓐᓇᒃᑯ ᐱᓕᕆᐊᕆᓇᓱᒋᐊᖃᖅᑕᕗᑦ.

ᓇᓂᒃᑲᓗᐊᖅᑎᓪᓗᑎᒃᑭᐊᖅ ᑕᐃᒪᑐᖅ ᐃᕿᐊᑦᑕᐅᓕᖅᑕᐃᓕᒋᑦ, ᑕᐃᒪᑐᖅ ᐃᓄᖕᓂ ᖁᕕᐊᓱᒃᑎᑦᑎᖃᑦᑕᐃᓐᓇᕐᓂᐊᖅᐳᑎᑦ, ᓱᕐᓗᓕ ᓄᓇᒥᑎᓪᓗᑎᑦ ᐱᓚᐅᖅᑐᒥᓐ.

ᓇᒡᓕᒋᖦᖤᖅᐸᒋᑦ ᐱᖃᓐᓇᕆᔮᒃ

ᒋᐅᓪᒻ ᐃᑦᑐᒃᓴᕐᔪᐊᑦ ᓴᓚᑕᓐ